1371 juni 20, AKDOG
KADO inv nr 10, regest 58, 20-6-1371
Transcriptie Jan Timmers
Heinrich Vilroch wordt ledig leenman van Duitse Orde
Wir broeder Heynrich van Lewenberch landcommanduer der Balien van der Biessen doen kont allen den ghenen die desen brief soelen sien off horen lesen dat Heinrich geheiten Vilroch genoech gedaen heift ons ende onser orden van der Duytschen huse ende leedich leenman worden is. Broeder Robrechts van Vernenborch des commenduers van Ghemert in orber ende in name onser ordene vurs. te beeteringe omme der mysdaet wille die hi jegen onsen orden vurtijts misdaen heift waer omme wir den vurs. Heynrich ontvangen hebben vour onssen leedighen man ende hi heift onssen orden vurs. hulde ende truwe gesworen te halden, gelijc ende in allen der manyeren als ein man van lene sine gerechten here gesworen hulde ende truwe sculdich is te halden. Wilge mansschap wir den vurs. broeder Robrecht hebbe doen ontfangen in orber onssen ende vurs. orden vurs. overmits (?) Dyederich van Ghemert wapenthure, Everart Braechman ende Ansoem Maes sone van der Hoefstat die daer by stoenden in vurs. ordens huse ende wonyngen te Ghemert, alse leenmannen vurs. ordens vurs.
In ghetugenisse der waerheit so hebben wir den sygel onssen landcommenduersschap aen desen opene brieve ghehangen. Gegeven in den jair onssen heren als men schreft mccc seseventich ende ein des vridaechs vur sinte johans dach baptist.